Ազատան

Բնակավայրը գտնվում է Մանթաշ գետի աջ ափին, բարձրությունը ծովի մակերևույթից՝ 1490 մ:

Ազատանն ունի բարեխառն լեռնային կլիմա։  Գյուղում բնակություն են հաստատել եզդիներ, ռուսներ, ներկայումս բնակվում են Արցախից բռնի տեղահանված 4 ընտանիք: Գյուղի շրջակայքում կան ավազի, բազալտի պաշարներ, որոնք ունեն արդյունաբերական նշանակություն։ Գյուղատնտեսական հողահանդակները ոռոգվում են Շիրակի ջրանցքի ջրերով։  

Ազատանն ունի միջնակարգ դպրոց (նորակառույց), մանկապարտեզ, մշակույթի տուն, մարզմաշակութայնի կենտրոն՝ տարբեր բաժիններով, սպորտդպրոց, գրադարան, բուժամբուլատորիա, փոստային բաժանմունք, անասնաբուժարան, ֆուտբոլի մարզադաշտ, ժամանցի կենտրոն նախատեսված տարեցների համար, վարկային բաժանմունք:

Գյուղն ունի կաթնամթերքի և պանրի արտադրության Իգիթ ՍՊԸ-ն։ Ազատանում իրար կից գործում են և՛ հայ Առաքելական, և՛ հայ Կաթողիկե եկեղեցիները։

Գործում է Ազատան-Գյումրի-Ազատան երթուղին սպասարկող թվով 4 միկրոավտոբուս՝ 15 րոպեն մեկ պարբերությամբ:

Գյուղատնտեսության մասնագիտացման ուղղությունը երկրագործությունն է։ Զբաղվում են պտղաբուծությամբ, հացահատիկային,բանջարաբոստանային,կերային կուլտուրաների, կարտոֆիլի մշակությամբ, մեղվաբուծությամբ և անասնապահությամբ։ Ազատանն ունի 1071տնտեսություն։