Բնակավայրեր

Աշոտավանը գտնվում է Տոլորսի ջրամբարի արևմտյան ափին։ Ծովի մակարդակից 1660-1700 մ բարձրության վրա։

Աշոտավանում զարգացած է ազնվամորու տնտեսությունը, որը մեծ հետաքրքրություն է առաջացրել ինչպես գործարարների, այնպես էլ՝ զբոսաշրջիկների շրջանում։

Գյուղն ապահովված է արտաքին լուսավորությամբ, կանոնավոր կերպով իրականացվում է աղբահանությունը։

Աշոցքը գտնվում է Հայաստանի հյուսիս-արևմուտքում, ծովի մակարդակից բարձր է 2006-2039 մետր։ Աշոցք գյուղով է անցնում Գյումրի-Նինոծմինդա (Վրաստան) միջպետական նշանակության ավտոճանապարհը։ Կլիման բարեխառն է, կարճատև զով ամառով և երկար ձմեռով։

Աշոցքը տարածաշրջանի ամենամեծ բնակավայրն է։ Գյուղին տրամադրվել է գյուղտեխնիկա, ապահովված է լուսավորությամբ։ Բարեկարգվել են ճանապարհները և համայնքային կենտրոնը։ 

Աչաջուր համայնքը գտնվում է ՀՀ Տավուշի մարզի հարավ արևելյան մասում,  ծովի մակարդակից 750 մ բարձրության վրա։ Գյուղը մարզի ամենահին բնակավայրերից է, կենտրոնական դիրք է գրավում Տավուշի մարզում, աչքի է ընկել բնական աճով: Աչաջուրն ունի բարեխառն կլիմա։

Գյուղն ապահովված է խմելու և ոռոգման ջրով, գազաֆիկացված է։ Լուսավորված ու խճապատված են փողոցները: Իջևան քաղաքի և հարակից համայնքների հետ ունի տրանսպորտային միջոցներով կապի հնարավորություն։ 

Ապավենը գտնվում է Տաշիր քաղաքից 16 կմ հյուսիս-արևելք։ Բնակավայրի բարձրությունը ծովի մակարդակից 1700 մ է: Կլիման բարեխառն լեռնային է, տևական ձմեռներով։  Ամառները տաք են, համեմատաբար խոնավ։ Սահմանակից է Վրաստանի Հանրապետությանը:

Առկա է ջրամատակարարում: Կատարվում են ջրամատակարարման ցանցի բարելավման, ճանապարհաշինական աշխատանքներ։ Ապավենը ամբողջությամբ գազաֆիկացված է։

Աջաբաջը բարձրադիր գյուղ է՝ գտնվում է ծովի մակարդակիցից 2000 մետր բարձրության վրա։ Գյուղում հիմնական բնակչությունը քիչ է, հիմնականում գյուղատնտեսությամբ զբաղվող մարդիկ են։ 

Ավարտվել է Գեղի – Աջաբաջ ներհամայնքային ճանապարհի հիմնանորոգումը։ Կառուցվել է բնակավայրի փողոցային լուսավորության համակարգը։

Առաջաձորը գտնվում է Հայաստանի Սյունիքի մարզի Կապան համայնքում՝ Աճանան գետի աջափնյա լեռնալանջին՝ ծովի մակերևույթից 1060-1160 մ բարձրության վրա։ Սյունիքի մարզի մարզկենտրոն Կապան քաղաքից հեռու է 6 կմ դեպի հյուսիս-արևմուտք։ Բնակչությունը զբաղվում է կաթնաանասնաբուծությամբ։

Այս գյուղը Սյունիքի ամենահայտնի գյուղերից մեկն է, որտեղ մարդը բնակություն է հաստատել վաղնջական ժամանակներից, և այստեղով անցել են առևտրական ուղիներ, ինչպիսին է, օրինակ, Տաթև-Բաղաբերդ ճանապարհը: Գյուղում պահպանվում են բրուտի հնոցներ, որտեղ թրծում էին կավե ամաններ: Պահպանվում է նաև Բրուտի աղբյուրը:

Բնակավայրը գտնվում է Ախուրյան գետի ձախ և աջ ափերին։ Բարձրությունը ծովի մակերևույթից՝ 1500 մ է։ Կլիման բարեխառն  է, ձմեռը՝ տևական, հաստատուն ձնածածկույթով, ամառը՝ տաք, համեմատաբար խոնավ։ Առափիում գործում է ոռոգման և խմելու ջրի համակարգ, բուժամբուլատորիա, Հայփոստի բաժանմունք։

Աստղաձոր բնակավայրը գտնվում է նույնանուն գետի ներքին հոսանքի շրջանում, համայնքի կենտրոնից 5 կմ հարավ-արևելք և ծովի մակարդակից 2030 մ բարձրության վրա: Մարզկենտրոն Գավառից գտնվում է 39 կմ հարավ–արևելք, Սևանա լճից՝ 2կմ հեռավորությամբ։

Ավազան գյուղը գտնվում է Սևանի լեռների ստորոտին, լճափից ոչ հեռու։

Կառավարության կողմից 2023 թվականից իրականացվող սուբվենցիոն ծրագրով բարելավվել է գյուղի բոլոր տնտեսությունների ջրամատակարարումը։ Ծրագրի իրականացման շնորհիվ Ավազանի խմելու ջրի քանակությունն ավելացել է մի քանի անգամ, ինչը լիովին բավարար է՝ սահմանամերձ այս գյուղում մշտական ու որակյալ ջրամատակարարում ապահովելու համար։ Գյուղում հիմնվել է պտղատու այգի։ Կառավարության աջակցությամբ կառուցվել են աղբյուրակապեր։

Բնակավայրը տարածված է Ախուրյան գետի ձախ ափին, մարզկենտրոն Աշտարակից՝ 75 կմ և Երևանից՝ 80 կմ հեռավորության վրա։ Բնակչությունը զբաղվում է անասնապահությամբ, այգեգործությամբ և երկրագործությամբ։ 

Բնակլիմայական  պայմանները  բարենպաստ  են  առվույտի,  ցորենի,  գարու,  հատկապես  պտղատու  այգիների  համար: Հողատարածքները  հիմնականում ոռոգվում են ինքնահոս կերպով, մասնակիորեն՝ խորքային հորերից: Արագածավանում ձմեռը մեղմ  է, ամառը`շոգ ու հիմնականում երաշտ:

Արավետը (նախկին անվանումը՝ Չայբասար, ավելի վաղ անցյալում նաև` Իլանլի) գտնվում է Շիրակի մարզի Ամասիայի տարածաշրջանում, Աշոցքի սարավանդում, ծովի մակերևույթից շուրջ 2000 մետր բարձրության վրա՝ Ալվար գյուղից 3 կմ հյուսիս-արևելք: 

Արավետ է վերանվանվել 1991 թվականին։ Գտնվում է Ախուրյան գետի վերին հոսանքում, նրա աջ ափին։ Բնակավայրը չունի մշտական բնակչություն։

Արավուս գյուղը գտնվում է ծովի մակարդակից 1350-1390 մ բարձրության, մարզկենտրոնից՝ 87 կմ, Գորիս քաղաքից՝ 22 կմ հեռավորության վրա։  

Պետությունն իրականացնում է երթևեկող ուսուցիչների և աշակերտների տրանսպորտային ծախսերի փոխհատուցման ծրագիր։ Առաջիկայում բուժակ-մանկաբարձական կետ կկառուցվի։ Լուսավորվել է Տեղ-Արավուս 1650 մետր երկարությամբ ճանապարհը։