Բնակավայրեր

Դդմաշեն բնակավայրը տեղակայված է Սևան քաղաքից 12 կմ հեռավորության վրա։ Դտնվում է ծովի մակարդակից 1800-2400 մ բարձրության վրա։ Գյուղի միջով անցնում է Հրազդան գետը: Դդմաշեն գյուղի հողային տարածքը զբաղեցնում է Փամբակի լեռնաշղթայի հարավային թեքության լանջերի և Հրազդան գետի առանձին հատվածները:

Համայնքի վարչական տարածքը հատում է M-4 միջպետական նշանակության ավտոմայրուղին, համայնքի տարածքով է անցնում Գեղարքունիքի մարզը Կոտայքի մարզին կապող H-29 հանրապետական նշանակության ավտոճանապարհը:

Գյուղը գազաֆիկացված է, ներհամայնքային ճանապարհերը՝ բարեկարգ։

Դեբեդ բնակավայրը գտնվում է Փամբակ գետի աջ կողմում՝ Գյումրի-Բագրատաշեն մայրուղուց 2.5կմ հեռավորության վրա, պետական սահմանից՝ 60կմ: Ծովի մակարդակից բարձր է 980-1080 մ: Գյուղի տարածքը լեռնային է, մեղմ կլիմայով։

Բնակավայրը անտառամերձ է, բնակավայրի կենտրոնով է անցնում Փամբակ գետի աջակողմյան վտակ՝ Ալարեքսը, առկա են նաև բազմաթիվ մաքուր ջրաղբյուրներ:Վանաձոր քաղաքից մինչև բնակավայր տանող ճանապարհը ասֆալտապատ է, բնակավայրի փողոցներում գրեթե ամբողջությամբ անցկացված է գիշերային լուսավորության ցանց:

Բնակավայրը գտնվում է Նոյեմբերյանի տարածաշրջանում, Նոյեմբերյան քաղաքից հյուսիս-արևմուտք, Դեբեդ գետի ցածրադիր ափին, ծովի մակերևույթից 380 մ բարձրության վրա, ՀՀ պետական սահմանից՝ 1 կմ հեռավորության վրա։ Հայաստանի ամենացածրադիր գոտիներից է։ Սահմանակից է Վրաստանին։ Դեբեդավանում Կառավարության աջակցությամբ կառուցվել է նոր մանկապարտեզ. տրամադրվել է նոր գույք։ 

Բնակլիմայական պայմանների տեսանկյունից գտնվում է բարեխառն գոտում։ Այստեղ աճում են զեյթուն, նուշ, նուռ, դեղձ, խաղող և այլ արևադարձային կուլտուրաներ: Կլիման մեղմ է, մերձարևադարձային ցանկացած կուլտուրա կարելի է աճեցնել, կան արքայանարնջի, դեղձի, խաղողի նորատունկ այգիներ։ Բերքը արտահանում են հիմնականում Վրաստան։

Դեղձավան գյուղը գտնվում է Տավուշի մարզի Նոյեմբերյանի տարածաշրջանում,Նոյեմբերյան քաղաքից մոտ 12 կմ հյուսիսարևելք, Դեբեդ գետի աջափնյակում, Վրաստանի հետ պետական սահմանից 1-2 կմ հեռավորության։

Բնակավայրը գազաֆիկացված է։  Ճանապարհների վիճակը՝ բարվոք։ Գյուղում վերանորոգվել է բուժկետը։ 

Հիմնվող նոր այգետարածությունները պայմաններ են ստեղծել բնակչության սոցիալ-տնտեսական վիճակի բարելավման համար:

Բնակավայրը եզդիաբնակ գյուղ է Թալինի տարածաշրջանում, Թալին քաղաքից 18 կմ հեռավորության վրա։ Մարզկենտրոնից գտնվում է 37 կմ հեռավորության վրա։ Նախկինում ունեցել է Րիան, անվանումը և մտել է Երևանի նահանգի Էջմիածնի գավառի մեջ։ Տեղադրված է քարքարոտ սարավանդի վրա։

Բնակչությունը՝ 131 մարդ։ 

Դիտավանը գտնվում է մարզկենտրոն Իջևանից 9 կմ հյուսիս-արևելք, ծովի մակարդակից 800 մ բարձրության վրա։ Գյուղի ընդհանուր մակերեսը 582 հա է: 

Դիտավանում կառուցվել է նոր դպրոցի շենք, որտեղ տեղակայվել է նաև փոքր մարզադահլիճ: Դպրոցը լիովին կահավորվել է, տրամադրվել են համակարգիչներ և համապատասխան սարքավորումներ: Գյուղում վերանորոգվել է նաև գազատարը։  Հիմնանորոգվել է Դիտավան գյուղի ճանապարհը։ Ապահովված է խմելու և ոռոգման ջրով։ 

Գործարկված է Վազաշեն֊Այգեհովիտ֊Ազատամուտ֊Դիտավան֊Իջևան և հետադարձ ուղղություններով միջհամայնքային տրանսպորտ։

Դիցմայրի գյուղը գտնվում է Կապանից 7 կմ արևելք՝ ծովի մակարդակից 800-900 մ բարձրության վրա։

Առկա է ոռոգման համակարգ, գազամատակարարում։  Բնակչությունը հիմնականում զբաղվում է անասնապահությամբ։

Դովեղ գյուղը գտնվում է Տավուշի հյուսիս-արևելյան սահմանագլխին,ՀՀ պետական սահմանից 1.5 կմ հեռու, ծովի մակարդակից՝ 720 մ բարձրության վրա։ 

«Դովեղ» բարեգործական հիմնադրամը աջակցում է գյուղին։ Համայնքը էլեկտրաֆիկացված է, գազաֆիկացված է, հեռախոսակապը գործում է դեռ 1966 թվականից, ճանապարհների վիճակը՝ բարվոք։ Գյուղում վերջերս նոր այգի է բացվել։ 

Կառուցվում է նոր, վերազինված դպրոց։

Դպրաբակը գտնվում է Գետիկի ստորին հոսանքի ձախ և աջ ափերին՝ ծովի մակարդակից 1240 մետր բարձրության վրա։  Հողը բերրի է՝ խիստ նպաստավոր բուսաբուծության և այգեգործության համար։

Կառավարության 2021-26 թթ․ ծրագրով Դարաբակում առողջության առաջնային պահպանման կենտրոն կստեղծվի։ Բարեկարգվում է մշակույթի տան շենքը, խաղահրապարակ է կառուցվում։

Դսեղը գտնվում է ՀՀ Լոռու մարզում, Դեբեդ գետի աջափնյա սարահարթի վրա։ Բնակավայրի հեռավորությունը միջպետական նշանակության Երևան-Թբիլիսի մայրաղու Վանաձոր-Ալավերդի հատվածից` 8կմ։ Համայնքի վարչական տարածքը գտնվում է ծովի մակերևույթից 829-2180մ բարձրության վրա, որը և հանգեցրել է կլիմայական պայմանների ընդգծված տարբերության ներքին, միջին և վերին հատվածներում։ Դսեղն աչքի է ընկնում համեմատաբար մեղմ և խոնավ կլիմայով։ Տարվա մեծ մասը գյուղը ենթարկվում է Միջերկրական և Սև ծովերի խոնավ օդային զանգվածների հոսքին, որոնք բերում են առատ տեղումներ։ 

Դրախտիկ գյուղը  գտնվում է Հայաստանի Հանրապետության Գեղարքունիքի մարզում, Արեգունի լեռների հարավային լանջին , Սևանա լճի ավազանի Դրախտիկ գետի ափին, ծովի մակերևույթից 1980 մետր բարձրության վրա։ Բնակավայրը գտնվում է  Սևանա լճից 3 կմ հեռավորության վրա, պատված է Արեգունի լեռնաշղթայով, համայնքում առկա է հանգստյան գոտի, հյուրատներ, ձիարշավարան։

Դրախտիկում կառուցվել է գազատարի ներքին ցանցը, խմելու ջրատարի արտաքին ցանցը և օրվա կարգավորիչ ջրամբարը՝ խմելու ջրատարի ներքին ցանցը, լուծվել է նաև գյուղի լուսավորության հարցը։  Նախատեսված է մշակութային կենտրոն ստեղծել։ 

Ելփին գյուղը գտնվում է Վայոց Ձորի հարավ-արևմտյան մասում։ Հողատարածությունները ձգվում են ծովի մակարդակից 1400-2800 մ բարձրության սահմաններում։ 

Գյուղն ապահովված է ոռոգման և խմելու ջրերով, գազաֆիկացված է, լուսավորության նոր համակարգ է դրված, ասֆալտապատվել են ճանապարհները, տրամադրվել է գյուղտեխնիկա։ Գործում է կանոնավոր երթուղի դեպի շրջկենտրոն։